Կիրակի, 23 Սեպտեմբերին, Կլենտէյլի մէջ կառուցուելիք Հայ-Ամերիկեան թանգարանի հիմնադիր խորհուրդը մեկնարկեց թանգարանին ի նպաստ հանգանակային եւ քարոզչական իր աշխատանքները։ Թանգարանին կամաւոր ծառայողներ Ս. Աստուածածին եկեղեցւոյ մէջ կատարեցին տեղեկատուական աշխատանք, բացատրական թղթիկներ բաժնեցին եւ արձանագրեցին նուիրատուութիւններ։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, Ս. Քառասնից Մանկանց եկեղեցւոյ մէջ իր ուղղած պատգամին ընդմէջէն, կոչ ուղղեց մեր ժողովուրդին, որ մասնակից դառնայ թանգարանի ծրագիրին իրականացման ճիգերուն։ Նոյն օրը, մեր բոլոր եկեղեցիներուն ընթերցուեցաւ Առաջնորդ Սրբազանին նոյնիմաստ կոչը։
Այս աշխատանքը պիտի շարունակուի յառաջիկայ շաբաթներուն, պիտի ընդգրկէ նաեւ մեր եկեղեցիներն ու Ազգային վարժարանները։ Կիրակի, 30 Սեպտեմներին, կամաւոր աշխատողները պիտի ըլլան Էնսինոյի Ս. Նահատակաց եկեղեցի։
