Տարիներու սովորութեան համաձայն, այս տարի եւս, Հայաստանեայց Առաքելական Եկեղեցւոյ Եղբայրակցութեան ներկայացուցիչներ Ազգային Առաջնորդարան այցելեցին Ուրբաթ, 9 Յունուար 2015ի առաւօտեան, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանը շնորհաւորելու Նոր Տարուան եւ Ս. Ծննդեան տօնին առիթով:
Եղբայրակցութեան վարչութեան չորս անդամներ մտերմիկ հանդիպում մը ունեցան Առաջնորդ Սրբազան Հօր հետ: Հանդիպումին ներկայ եղաւ Հոգշ. Տ. Պօղոս Աբղ. Թինքճեան:
Ատենապետ Աւօ Եղբ. Գապաքչուզեան, իր հոգեւոր եղբայրներուն ու Եղբայրակցութեան կողմէ շնորհաւորեց Սրբազան Հօր Նոր Տարին ու Ս. Ծնունդը, մաղթելով առողջութիւն ու ապագայի ծրագիրներու յաջողութիւն: Ան նաեւ իր երախտապարտութիւնը յայտնեց տարուան ընթացքին Եղբայրակցութենէն ներս հոգեւորականներու ներկայութեան ու Սրբազան Հօր յարատեւ հոգածութեան համար:
Առաջնորդ Սրբազանը, տեղեկանալէ ետք Եղբայրակցութեան անցնող տարուան գործունէութեան մասին, իր յորդորներն ու ցուցմունքները ուղղեց Եղբայրակցութեան անդամներուն, մաղթելով վարչական աշխատանքներու յաջողութիւն եւ հոգեւոր առաւել զարթնում ու աճում:
Աւարտին, տեղի ունեցաւ յուշանուէրներու փոխանակում:
