Կիրակի, 14 Հոկտեմբեր 2018-ի երեկոյեան, Կլենտէյլի «Ուիլսըն» հանրային վարժարանի սրահին մէջ տեղի ունեցաւ Հայ Օգնութեան Միութեան Արեւմտեան Միացեալ Նահանգներու 35-ամեակի տօնախմբութիւնը։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ներկայ եղաւ հանդիսութեան եւ ուղղեց իր գնահատանքի եւ օրհնութեան խօսքը։ Առաջնորդ Սրբազանին ընկերացաւ Արժ. Տ. Արտակ Քհնյ. Տէմիրճեան։
Հանդիսութիւնը սկսաւ Հ.Մ.Ը.Մ.-ի սկաուտներուն դրօշակի արարողութեամբ եւ Միացեալ Նահանգներու, Հայաստանի ու ՀՕՄ-ի քայլերգներով, զորս յաջորդաբար կատարեցին Սուրէն Հազարեան եւ ՀՕՄ-ի շաբաթօրեայ վարժարաններու աշակերտական երգչախումբը, խմբավարութեամբ Տիկին Լուսինէ Մելիքսէթեանի։ Հանդիսավարն էր Տիկին Սօնա Մատարեան։ Շրջանային Վարչութեան անունով խօսք առաւ Տիկին Մարալ Թուլումեան, գլխաւոր բանախօսն էր Հ.Յ.Դ. Բիւրոյի անդամ Դոկտ. Վիգէն Եագուպեան։ Ցուցադրուեցաւ ՀՕՄ-ի գործունէութիւնը պատկերող տեսաերիզ մը։ Երեկոն ունէր գեղարուեստական ճոխ յայտագիր, որոուն մասնակցութիւն բերին Համազգայինի «Անի» պարախումբը, Նանօր եւ Ծովակ Սերայտարեան (ջութակի վրայ նուագներ), Դրօ Գրիգորեան (երգեր), ընկերակցութեամբ Արա Տապանճեանի, Տիկին Մարալ Վարժապետեան (ասմունք) եւ շաբաթօրեայ վարժարանի երգչախումբը։
Հանդիսութեան աւարտին, Առաջնորդ Սրբազանը շնորհաւորեց ՀՕՄ-ի մեծ ընտանիքը, նաեւ յանձնեց ՀՕՄ-ի «Մայր» մասնաճիւղին 100-ամեակին առիթով իր շնորհած օրհնութեան գիրը։
