Երկուշաբթի, 2 Ապրիլին, մեռելոց յիշատակը հոգեհանգստեան արարողութեամբ նշուեցաւ «Ֆորէսթ Լոն» գերեզմանատան մէջ, գլխաւորութեամբ Առաջնորդ Սրբազանին եւ մասնակցութեամբ հոգեւորականաց դասու անդամներուն։ Առաջնորդական Փոխանորդ Գերպ. Տ. Թորգոմ Ծ. Վրդ. Տօնոյեան փոխանցեց օրուան հոգեւոր խօսքը։
Նկատի ունենալով, որ նոյն օրը կը զուգադիպէր 2016-ին Արցախի վրայ ազերիական յարձակումին ու չորսօրեայ խիզախումներու Բ. տարելիցին, հոգեհանգստեան պահուն առաջին հերթին Առաջնորդ Սրբազանը աղօթք բարձրացուց առ Աստուած, որպէսզի «անմահութեան նահատակներուն» հոգիները արժանացնէ երկինքի արքայութեան։ Այնուհետեւ, կատարուեցաւ «Անդաստանի» արարողութիւն, որուն ընթացքին օրհնուեցան աշխարհի չորս ծագերը։ Արարողութիւնները տեղի ունեցան գերեզմանատան շրջաբակին մէջ։
Արարողութիւնը վերջ գտաւ «Կիլիկիա»ի եւ «Մեր Հայրենիք»ի խմբերգումով։
