Շաբաթ, 11 Մայիս 2019-ին, Թեմիս բարեխնամ Առաջնորդ Բարձ. Տ. Մուշեղ Արք. Մարտիրոսեանին օրհնութեամբ, Արժ. Տ. Պօղոս Քհնյ. Պալթայեան եւ Բարշ. Րաֆֆի Սրկ. Կարապետեան այցելեցին Քասթէյքի «Փիթչըս» բանտը, ուր Ս. Զատկուան առիթով յատուկ արարողութիւն եւ ջրօրհնէք կատարուեցաւ։
«Տէր Ողորմեա»էն առաջ, Րաֆֆի Սարկաւագ ներկաներուն փոխանցեց Առաջնորդ Սրբազան Հօր օրհնութիւններն ու ողջոյնի խօսքը եւ խօսեցաւ զղջումի կարեւորութեան մասին։ Տէր Հայրը իր քարոզին մէջ Ս. Յարութեան սիրոյ եւ յոյսի պատգամը փոխանցեց ու երիտասարդները հրաւիրեց, որ իրենց կեանքը ապրին Քրիստոսի սիրով, խոնարհութեամբ ու ամուր հաւատքով։
Ներկաները Ս. Հաղորդութիւն ստացան, ապա տեղի ունեցաւ հիւրասիրութիւն ու Առաջնորդ Սրբազան Հօր կողմէ բոլորին բաշխուեցաւ աղօթագիրքեր։ Աւարտին, երիտասարդները գոհունակութիւն յայտնեցին օգտաշատ այցելութեան համար։
