Երեքշաբթի, 18 Փետրուար 2014-ի յետ միջօրէին, Կլենտէյլի «Adventist» հիւանդանոցի նախագահ՝ Տիար Քեվըն Ռոպըրթս առաջին այցելութիւնը տուաւ Ազգային Առաջնորդարան, ուր մտերմիկ եւ ջերմ մթնոլորտի մէջ հանդիպում մը ունեցաւ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի հետ: Հանդիպումին ներկայ էր նաեւ Ս. Աստուածածին Եկեղեցւոյ Հոգեւոր Հովիւներէն՝ Արժ. Տ. Վազգէն Քհնյ. Աթմաճեան։
Առաջնորդ Սրբազանը բարի գալուստ մաղթեց հիւրին, որմէ ետք խօսակցութիւնները ընդհանրապէս կեդրոնացան մեր գաղութը յուզող հարցերու շուրջ, յատկապէս հիւանդանոցին մատուցած ծառայութիւններուն եւ Ազգային Առաջնորդարանի ու հիւանդանոցի տարիներու գործակցութեան վրայ։
Տիար Քեվըն իր գոհունակութիւնը յայտնեց որ Առաջնորդ Սրբազանը մօտէն հետաքրքրուած է հիւանդանոցի աշխատանքներով եւ շնորհակալութիւն յայտնեց հիւանդանոցի նկատմամբ Ազգային Առաջնորդարանի գուրգուրանքին եւ մեր եկեղեցիներու մատուցած հոգեւոր խնամքին, յատկապէս հովիւներու մնայուն այցելութեանց եւ տարիներու աւանդութիւն դարձած խաղողօրհնէքի արարողութեանց համար։
Հանդիպման ընթացքին առաւել սերտ գործակցութեան հեռանկարով կարգ մը ծրագիրներու մասին մտքի փոխանակութիւն տեղի ունեցաւ, որմէ ետք Առաջնորդ Սրբազան Հայրը յարգելի հիւրին յանձնեց յուշանուէր մը։
