Մոնթեպելլոյի Ս. Խաչ Մայր Տաճարի նախաձեռնութեամբ, Շաբաթ, 19 Մայիս 2018-ին, տեղի ունեցաւ տարեկան «Հայկական Ճաշերու Փառատօն»ը, որ հայկականութեան մթնոլորտ մը ստեղծեց տաճարի շրջափակին մէջ. ներկաները վայելեցին հայկական ճաշեր, երաժշտութիւն եւ մշակութային արտայայտութիւններ։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ներկայ եղաւ ձեռնարկին, այցելեց կրպակները, գնահատեց այս նախաձեռնութիւնը եւ ուղղեց իր պատգամը։ Առաջնորդ Սրբազանին կողքին էին Մայր Տաճարի հոգեւոր տեսուչ Գերպ. Տ. Միւռոն Ծ. Վրդ. Ազնիկեան, հոգեւոր հովիւ Արժ. Տ. Աշոտ Քհնյ. Գամպուրեան, հոգաբարձութեան ու կազմակերպիչ յանձնախումբի անդամներ։
Խանդաւառ մթնոլորտ մը կը տիրեր ներկայութեամբ բազմահարիւր հայ եւ օտար մասնակիցներու։
