Ուրբաթ, 27 Փետրուար 2015ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ազգ. Առաջնորդարանին մէջ ընդունեց այցելութիւնը LA2DC նախաձեռնութեան կազմակերպիչներուն՝ Օհան Պաղտասարեանի, Կրէկ Աղամանուկեանի եւ Վահէ Պապայեանի, որոնք եկած էին լուսաբանութիւն տալու Ցեղասպանութեան 100ամեակի յիշատակման իրենց իւրայատուկ ծրագիրին մասին:
Յարգելի հիւրերը բացատրեցին, որ 100ամեակին առիթով, կազմակերպած են Լոս Անճելըսէն դէպի Ուաշինկթըն հեծելարշաւ մը, որուն նպատակն է ուշադրութիւն կեդրոնացնել եւ հետաքրքրութիւն շարժել ցեղասպանական անցեալի արարքներու գծով, անոնց կրկնութիւնը կանխարգիլելու նախանձախնդրութեամբ: Արշաւը սկիզբ պիտի առնէ 24 Ապրիլին, Լոս Անճելըսէն: Մասնակցողները Ուաշինկթըն պիտի հասնին 7 Մայիսին, երբ նախատեսուած է Ցեղասպանութեան 100ամեակին առիթով յատուկ յուշահանդէսներ ու արարողութիւններ, ի ներկայութեան Հայց. Առաքելական Եկեղեցւոյ երկու Վեհափառ Հայրապետներուն եւ Հայաստանի Հանրապետութեան նախագահին:
Առաջնորդ Սրբազանը գնահատեց այս ուշագրաւ եւ մեծ ճիգ պահանջող ծրագիրը, օրհնեց բոլոր մասնակիցները եւ մաղթեց, որ մեր իրաւունքներուն ծանօթացման նպաստող այս արշաւը պսակուի յաջողութեամբ:
