Ուրբաթ, 28 Սեպտեմբեր 2018-ի յետմիջօրէին, Թեմիս բարեխնամ Առաջնորդ Տ. Մուշեղ Ս. Արք. Մարտիրոսեան Ազգային Առաջնորդարանի իր գրասենեակին մէջ ընդունեց այցելութիւնը Կլենտէյլի «Memorial» հիւանդանոցի նոր նշանակեալ նախագահ Տիկին Ճիլ Ուելթընի, որուն կ’ընկերանային հիւանդանոցի պատասխանատուներէն Տիկին Մէրի Ֆիլիփեան եւ հոգեւոր խորհրդատու Քէսի Մըքարթի։ Հանդիպումին ներկայ եղաւ Արժ. Տ. Մովսէս Քհնյ. Շաննագեան։
Առաջնորդ Սրբազանը ողջունեց յարգելի հիւրերը, շնորհաւորեց նոր նշանակեալ տնօրէնուհին եւ յաջողութիւն մաղթեց անոր ու գործակիցներուն մարդասիրական առաքելութեան։ Հիւրերուն փափաքով, Առաջնորդ Սրբազանը ընդհանուր տեղեկութիւններ տուաւ մեր Եկեղեցւոյ ու մասնաւորաբար Ազգային Առաջնորդարանիս պատմութեան մասին։
Տիկ. Ուելթըն շնորհակալութիւն յայտնեց ջերմ ընդունելութեան համար, նաեւ երախտագիտութիւն՝ հիւանդանոցին հետ Ազգ. Առաջնորդարանին սերտ գործակցութեան համար։ Հանդիպման աւարտին, Առաջնորդ Սրբազանը յուշանուէրներ յանձնեց հիւրերուն։
