Կիրակի, 26 Մայիս 2019-ին, Հայաստանի Ա. Հանրապետութեան հիմնադրութեան 101-ամեակին առիթով, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի տնօրինումով, Թեմիս բոլոր եկեղեցիներուն մէջ Հանրապետական Մաղթանք եւ եռագոյն դրօշի օրհնութիւն պիտի կատարուի։ Ս. Պատարագի աւարտին, հոգեհանգստեան աղօթք պիտի բարձրացուի Սարդարապատի, Ղարաքիլիսէի, Բաշ Ապարանի եւ այլ ճակատամարտներուն ինկած հերոսներուն հոգիներուն համար։
Առաջնորդ Սրբազանը պիտի հանդիսապետէ Էնսինոյի Ս. Նահատակաց եկեղեցւոյ Ս. Պատարագին եւ Հանրապետական Մաղթանքի արարողութեան, պիտի կատարէ Եռագոյն Դրօշի օրհնութիւնը եւ փոխանցէ իր պատգամը։ Իսկ Առաջնորդական Փոխանորդ Գերշ. Տ. Թորգոմ Եպս. Տօնոյեան պիտի հանդիսապետէ Նորթ Հոլիվուտի եկեղեցւոյ Ս. Պատարագին եւ Հանրապետական Մաղթանքի արարողութեան։
Կը հրաւիրենք մեր հաւատացեալ ժողովուրդը ներկայ գտնուելու հոգեպարար արարողութեան աղօթք բարձրացնելու մեր անկախ հայրենիքին ու ժողովուրդին ապահովութեան ու բարգաւաճման համար, եւ վերանորոգելու անկախութեան սերունդի կտակին հաւատարմութեան մեր ուխտը։
