Կիրակի, 1 Նոյեմբեր 2015ի երեկոյեան, «Լարք» Երաժշտական Ընկերակցութիւնը կազմակերպած էր մեծարանքի ձեռնարկ մը, որ տեղի ունեցաւ Լոս Անճելըսի «Jonathan Club»ին մէջ, ներկայութեամբ «Լարք»ի պատասխանատուներուն եւ բարեկամներուն: Մեծարուեցաւ ընկերակցութեան բարերարներէն Տէր եւ Տիկին Ճօ եւ Ճոյս Սթայն ամոլը, առ ի գնահատանք իր բազմամեայ ծառայութիւններուն եւ բարերարութեանց:
Հոգշ. Տ. Պօղոս Վրդ. Թինքճեան, ներկայացնելով Առաջնորդ Սրբազանը, օրհնութեան ու գնահատանքի իր գիրը յանձնեց մեծարեալներուն: Իր գնահատագիրին մէջ, Առաջնորդ Սրբազանը դրուատիքով կþանդրադառնար Սթայն ամոլին բազմամեայ ծառայութիւններուն եւ նուիրաբերումներուն, որոնք ի սպաս դրուած են հայկական հաստատութեանց եւ նպատակներու: Ան կը նշէր, որ Սթայն ամոլը հաւատարիմ մնացած է Քրիստոսի այն պատգամին, ըստ որուն՝ «Աւելի երանելի է տալը, քան թէ առնելը», հետեւաբար, անոր ծառայութիւններն ու նուիրաբերումները կը մարմնաւորեն քրիստոնէական վարքագիծ, մանաւանդ որ անոնք իրենց ժամանակն ու նիւթական միջոցները նուիրաբերած են համեստօրէն: Առաջնորդ Սրբազանը կը գնահատէր նաեւ «Լարք»ը, որ 20 տարիէ ի վեր հետամուտ է հայկական մշակոյթի դարաւոր ժառանգութեանց պահպանման ու տարածման, ինչպէս նաեւ այդ հարստութիւնները նոր սերունդներուն փոխանցման նուիրական աշխատանքին: