Ի լուր Քալիֆորնիոյ նախկին նահանգապետ Ճորճ Տէօքմէճեանի մահուան գոյժին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, յանուն Արեւմտեան մեր Թեմի մեծ ընտանիքին, ցաւակցագիր մը յղեց հանգուցեալի այրիին՝ Կլորիայի, զաւակներուն՝ Լեսլիի, Ճորճի եւ Անտրէայի, թոռներուն ու ընտանեկան հարազատներուն, աղօթք բարձրացնելով, որ Երկնաւոր Հայրը այս դժուար օրերուն անոնց պարգեւէ հոգեկան զօրութիւն եւ խաղաղութիւն։
«Ճորճ Տէօքմէճեան անունը հոմանիշ մըն է պարկեշտութեան, ուղղամտութեան, արժանապատիւ մարդու եւ քաջութեան, գրած է Առաջնորդ Սրբազանը։ Ան տասնամեակներու վրայ երկարող իր ծառայական կեանքին մէջ, հպարտութիւն ներշնչած է ո՛չ միայն ամերիկահայերուս, այլ նաեւ բոլոր քալիֆորնիացիներուն։ Յատկապէս հայ ժողովուրդին համար, ան եղած է օրինակելի անձնաւորութիւն եւ ներշնչումի աղբիւր, նպաստած է, որ ուրիշներ եւս մուտք գործեն քաղաքական ասպարէզ եւ բարի հետքեր թողուն հաւաքական կեանքին մէջ, իրենց անձնդիր ծառայութեամբ։ Մէկ խօսքով, ան մեծ մարդ էր, բարոյական բարձր սկզբունքներու տէր եւ բացառիկ ղեկավար։ Անոր բացակայութիւնը պիտի զգանք բոլորս»։
