Երեքշաբթի, 16 Սեպտեմբեր 2014ի կէսօրին, Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան Ազգ. Առաջնորդարանին մէջ ընդունեց այցելութիւնը Ատրպատականի Հայոց Թեմի Առաջնորդ՝ Գերշ. Տ. Գրիգոր Ս. Եպս. Չիֆթճեանի, որ անձնական այցելութեան մը համար Լոս Անճելըս ժամանած է:
Հանդիպումը առիթ եղաւ խորհրդակցելու մեր եկեղեցին եւ Հայաստանն ու Սփիւռքը յուզող անմիջական հարցերու շուրջ. ծանօթ է, որ յառաջիկայ օրերուն, Երեւանի մէջ տեղի պիտի ունենայ Հայաստան-Սփիւռք խորհրդաժողովը, որուն օրակարգին վրայ տեղ ունի Ցեղասպանութեան 100ամեակը, իսկ յառաջիկայ Նոյեմբերին, Ս. Էջմիածինի մէջ տեղի պիտի ունենայ մեր եկեղեցւոյ Եպիսկոպոսաց Բ. Ժողովը: Հիւր Սրբազանը Հայրը անդամ է այդ ժողովէն բխած Ծիսակատարութեան յանձնախումբին, իսկ Թեմիս Առաջնորդ Սրբազանը անդամ է Նահատակներու Սրբադասման յանձնախումբին:
