Չորեքշաբթի, 20 Օգոստոս 2014ի կէսօրին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ազգ. Առաջնորդարանին մէջ ընդունեց այցելութիւնը Սպահանի հայոց Թեմի Առաջնորդ Գերշ. Տ. Բաբգէն Եպս. Չարեանի, որ անձնական այցելութեամբ Լոս Անճելըս ժամանած է:
Հանդիպումը առիթ եղաւ խորհրդակցելու երկու Թեմերը յուզող հարցերու, ինչպէս նաեւ Մեծի Տանն Կիլիկիոյ Կաթողիկոսութեան առաքելութեան առնչուող խնդիրներու մասին: Յիշեցնենք, որ երկու Թեմակալ Առաջնորդները մաս կը կազմեն մեր զոյգ կաթողիկոսութեանց կողմէ կազմուած Սրբադասումի Յանձնախումբին, որուն առաքելութիւն տրուած է մշակել Ցեղասպանութեան նահատակներու, ինչպէս նաեւ վերջին դարերուն մեր եկեղեցւոյ ու ժողովուրդին համար իրենց կեանքը վկայաբերած զոհերուն եւ նուիրեալներուն սրբադասման կարգը:
Առաջնորդ Սրբազանին տնօրինումով, հիւր Սրբազան Հայրը Կիրակի, 24 Օգոստոսին պիտի քարոզէ Կլենտէյլի Ս. Աստուածածին եկեղեցւոյ մէջ:
