Թեմիս բարեխնամ Առաջնորդ բարձր. Տ. Մուշեղ Արք. Մարտիրոսեան շաբաթասկիզբին Անթիլիաս մեկնեցաւ, ուր Մեծի Տանն Կիլիկիոյ Կաթողիկոսութեան յարկին տակ մասնակցեցաւ Ազգային Կեդրոնական Վարչութեան Կրօնական եւ Քաղաքական ժողովներու լիակատար նիստերուն եւ անոնց զուգահեռ հանդիպումներուն։
Ազգային Կեդրոնական Վարչութեան ժողովները տեղի ունեցան նախագահութեամբ Ն.Ս.Օ.Տ.Տ. Արամ Ա. Վեհափառ Հայրապետին, որ նաեւ հանդիպումներ ունեցաւ թեմակալ առաջնորդներու եւ ներկայացուցիչներու հետ։
Կրօնական, դաստիարակչական, տնտեսական, վարչական, յարաբերական, միջ-եկեղեցական եւ այլ հարցերու շարքին, Ազգ. Կեդրոանական Վարչութիւնը յատուկ կարեւորութեամբ քննարկեց Հայոց Ցեղասպանութեան 100-ամեակին առնչուած ծրագիրներ ու աշխատանքներ, թէ՛ Կաթողիկոսարանի եւ թէ՛ թեմական մակարդակներու վրայ:
Առաջնորդ Սրբազանը ժողովին զեկուցում մը ներկայացուց Ցեղասպանութեան 100ամեակին առիթով մեր Թեմին մէջ նախատեսուած ձեռնարկներուն ու աշխատանքներուն մասին։
Լիակատար նիստերուն կողքին, Առաջնորդ Սրբազանն ու Ազգ. Կեդրոնական Վարչութեան մեր Թեմի անդամները՝ Տեարք Խաժակ Տիքիճեան, Վահէ Եագուպեան եւ Վիգէն Գասապեան առանձին հանդիպում մը ունեցան Վեհափառ Հայրապետին հետ, խորհրդակցելով Ս. Աթոռին հետ մեր Թեմի գործակցութեան հեռանկարներն ու ծրագրները։