Ինչպէս ծանօթ է, Ֆրեզնոյի մէջ վերջերս բացուեցաւ Հայաստանի Հանրապետութեան Պատւոյ Հիւպատոսարան:
Շաբաթ 1 Նոյեմբեր 2014-ի յետմիջօրէին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, Ս. Երրորդութիւն Մայր Եկեղեցւոյ հարիւրամեակի տօնակատարութեան մասնակցելու համար Ֆրեզնօ իր այցելութեան առիթով, այցելութիւն մը տուաւ Հ.Հ. Պատւոյ Հիւպատոսարանը: Սրբազան Հօր կþընկերանային Հոգշ. Տ. Պօղոս Աբղ. Թինքճեանն ու Ս. Երրորդութիւն Մայր Եկեղեցւոյ հովիւ Արժ. Տ. Վահան Քհնյ. Կոստանեան:
Սրբազան Հայրն ու ընկերակիցները դիմաւորուեցան նոր նշանակեալ Պատւոյ Հիւպատոսին՝ Տիար Պերճ Աբգարեանի եւ անձնակազմի կողմէ: Հիւպատոսարանի բաժանմունքները այցելելով, Առաջնորդ Սրբազանը գնահատեց տարուած աշխատանքը եւ Ֆրեզնոյի մէջ Հայաստանի հողի ներկայութիւնը:
Իր խօսքին մէջ, Սրբազան Հայրը կրկին անգամ շնորհաւորեց Պատւոյ Հիւպատոսին նոր պաշտօնը, մաղթելով յաջող ծառայութիւն, թէ՛ Հայ ազգին եւ թէ եկեղեցւոյ: Առաջնորդ Սրբազանը նշեց թէ Պատւոյ Հիւպատոսարանին բացման օրը, Առաջնորդական պարտականութեամբ Լաս Վեկասի համայնքին հետ ըլլալուն պատճառով, օրհնութեան ու շնորհաւորանքի գիր մը յղած էր, որ հոգեւոր հովիւին կողմէ ընթերցուեցաւ: Ան այս առիթով Ազգ. Առաջնոդարանի յուշանուէրը փոխանցեց Պատւոյ Հիւպատոսին:
Պատւոյ Հիւպատոսը գոհունակութիւն արտայայտեց Առաջնորդ Սրբազանին այս այցելութեան համար եւ շնորհակալութիւն յայտնեց օրհնութեան գիրին եւ բարեմաղթութիւններուն համար: