Չորեքշաբթի, 21 Օգոստոս 2019-ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ազգ. Առաջնորդարանի «Սիւլահեան» դահլիճին մէջ ընդունեց այցելութիւնը ՀՕՄ-ի Արեւմտեան Միացեալ Նահանգներու Շրջանային Վարչութեան նորընտիր կազմէն անդամներու, գլխաւորութեամբ ատենապետուհի՝ Տիկին Սիլվա Փօլատեանի։
Առաջնորդ Սրբազանը ողջունեց Շրջանային Վարչութեան անդամները, շնորհաւորեց նորընտիր կազմը եւ յաջողութեան մաղթանքներն ու օրհնութիւնները փոխանցեց անոնց։ Ապա, Շրջանային Վարչութեան անդամները ընդհանուր գիծերու մէջ ներկայացուցին իրենց ծրագիրները, որոնք կ՛ընդգրկեն մարդասիրական, կրթական եւ ընկերային ծառայութեան մարզերը, ինչպէս նաեւ զեկուցեցին հայրենիքին, Արցախին եւ Ջաւախքին ի նպաստ իրենց ծաւալած գործունէութեանց մասին։ Վարչութիւնը նաեւ պաշտօնապէս հրաւէր ուղղեց Առաջնորդ Սրբազանին յառաջիկայի իր գլխաւոր 3 նախաձեռնութիւններուն։
Յանուն Շրջանային Վարչութեան, Ատենապետուհին շնորհակալութիւն եւ երախտագիտութիւն յայտնեց Առաջնորդ Սրբազանին, իր յարատեւ զօրակցութեան եւ նեցուկին համար։
Առաջնորդ Սրբազանը բարձր գնահատեց ՀՕՄ-ի նուիրումն ու տարած ծաւալուն գործունէութիւնը, վերահաստատեց անոր առաքելութեան զօրակցութիւնը, եւ բարի երթ մաղթեց հայանուէր ու մարդասիրական իր ծառայութեան մէջ։
