Երկուշաբթի, 17 Յունիս 2014ին, Լոս Անճելըսի մեր համայնքը համախմբուած էր Beverly Hillsի “Montage” պանդոկին մէջ պատուելու եւ բարի երթ մաղթելու Միացեալ Նահանգներու մօտ Հայաստանի Հանրապետութեան լիազօր եւ արտակարգ Դեսպան մեծարգոյ Տիար Թաթուլ Մարգարեանին։
Թեմիս Առաջնորդ Բարձր. Տ. Մուշեղ Արք. Մարտիրոսեան կատարեց բացման աղօթքը ու փոխանցեց իր բարեմաղթութիւնները։ Ներկայ էին գաղութի կազմակերպութեանց պատասխանատու անձնաւորութիւններ, ինչպէս նաեւ Ազգային Վարչութեան անդամներ, Տիկնանց Օժանդակ Մարմնի անդամուհիներ եւ ծխական շրջաններու ներկայացուցիչներ։
Առաջնորդ Սրբազանը գնահատանքով արտայայտուեցաւ Դեսպան Թաթուլ Մարգարեանի գերազանց օրինակելի ղեկավարութեան մասին եւ դրուատեց անոր պատուաբեր ներկայացուցչութիւնը մեր Հայրենիքին իր մօտաւորապէս տասնամեակի մը պաշտօնավարութեան ընթացքին։ Սրբազանը նաեւ շնորհակալութիւն յայտնեց նուիրումով, խոնարհութեամբ, բարի կամքով ու գործակցութեան ոգիով իր ծառայութիւններուն համար եւ Պրն. Դեսպանին ու անոր ընտանիքին մաղթեց առողջութիւն եւ առաւել յաջողութիւն իր ապագայ ծառայական մարզերէն ներս։ Եզրափակելով, Սրբազան Հայրը աղօթեց առ Բարձրեալն Աստուած, որպէսզի պահպանուին ու մնայուն խաղաղութեան մէջ մնան մեր Հայրենիքն ու Հայ ազգը, նաեւ առաջնորդէ մեր ղեկավարները, որպէսզի նուիրումով եւ անձնուէր ծառայութեամբ սատարեն մեր ազգի բարօրութեան եւ բարգաւաճման։