Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, Ազգային Վարչութիւնն ու Ազգ. Վարժարաններու Խնամակալ Մարմինը այսու սրտի անհուն գոհունակութեամբ կը յայտարարեն, որ UCLAի յարկին տակ հաստատուած »Երազ Հիմնդրամ«ը (Dream Fund) 900,000 (ինը հարիւր հազար) տոլարի իշխանական յատկացում մը կատարեց Թեմիս Ազգային վարժարաններուն.-
– Մեսրոպեան երկրդ. վարժարան
-Ս. Նահատակաց Ֆերահեան երկրդ. վարժարան եւ
Մարի Գապայեան նախակրթարան
– Ռոզ եւ Ալեք Փիլիպոս երկրդ. վարժարան
– Վահան եւ Անոյշ Շամլեան վարժարան
– Արի Կիրակոս Մինասեան վարժարան
– Գռուզեան-Զաքարեան-Վասպուրական վարժարան
– Ռիչըրտ Թիւֆէնքեան մանկամսուր
– Լեւոն եւ Յասմիկ Թաւլեան մանկամսուր
Առաջնորդ Սրբազանը, Ազգ. Վարչութիւնն ու Խնամակալ Մարմինը այսու անհուն շնորհակալութիւն կը յայտնեն »Dream Fund«ին, այս կենսական նպաստին համար։ »Համայն մարդկութիւնը իր ճնշումին տակ առած տնտեսական տագնապի այս օրերուն, մեր ազգային վարժարանները կարիքն ունին նման աջակցութիւններու, որպէսզի կարենան անխափան շարունակել իրենց վսեմ առաքելութիւնը, ուսում ջամբելու մեր աշակերտներուն։ Այս յատկացումը մեծապէս պիտի նպաստէ մեր վարժարաններուն առաքելութեան կենսագործման, որուն համար խորապէս շնորհակալ ենք Հիմնադրամին«, յայտարարեց Առաջնորդ Սրբազանը։
»Dream Fund«ը 2011ին հաստատուած է UCLAի յարկին տակ, իբրեւ բարեսիրական հիմնադրամ, շնորհիւ »Լինսի« Հիմնարկութեան իշխանական նուիրատուութեան։ »Dream Fund«ի օժանդակութիւնները կը տրամադրուին մասնաւորաբար ուսումնական, առողջապահական, երիտասարդական եւ հասարակական նպատակներու համար։
ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
