ԱՌԱՋՆՈՐԴ ՍՐԲԱԶԱՆԸ ՊԻՏԻ ՀԱՆԴԻՍԱՊԵՏԷ ՆՈՐԹ ՀՈԼԻՎՈՒՏԻ ՀԱՅՑ. ԱՌԱՔԵԼԱԿԱՆ ԵԿԵՂԵՑՒՈՅ Ս. ՊԱՏԱՐԱԳԻՆ
Կիրակի, 31 Օգոստոս 2014ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան պիտի հանդիսապետէ Նորթ Հոլիվուտի Հայց. Առաք. Եկեղեցւոյ Ս. Պատարագին եւ պիտի փոխանցէ իր պատգամը։
Առաջնորդ Սրբազանը նոյն օրը նաեւ հանդիպում պիտի ունենայ եկեղեցւոյ Հոգաբարձութեան հետ, ծխական շրջանի ապագայի ծրագիրներուն մասին խորհրդակցելու համար:
***
ՄՈՒՍԱ ԼԵՐԱՆ ՀԵՐՈՍԱՄԱՐՏԻ 99-ԱՄԵԱԿԻ ՏՕՆԱԿԱՏԱՐՈՒԹԻՒՆ ՖՐԵԶՆՈՅԻ ԵՒ ԼՈՍ ԱՆՃԵԼԸՍԻ ՄԷՋ
Կազմակերպութեամբ Մուսա Լերան Հայրենակցական Միութեան, այս շաբաթավերջին տեղի պիտի ունենայ Մուսա Լերան Հերոսամարտի 99-ամեակի նուիրուած տօնակատարութիւնը, Ֆրեզնոյի Police Association’s Training Grounds համալիրին մէջ։
Առաջնորդ Սրբազան Հօր տնօրինումով, Հոգշ. Տ. Պօղոս Աբղ. Թինքճեան Շաբաթ, 30 Օգոստոսի երեկոյեան պիտի ժամանէ Ֆրեզնօ եւ աղօթքով մասնակցութիւն պիտի բերէ մատաղի պատրաստութեան. իսկ Կիրակի, 31 Օգոստոսի առաւօտուն, Ս. Պատարագ պիտի մատուցէ եւ պիտի կատարէ մատաղի օրհնութիւնը։
Քալիֆորնիոյ Մուսա Լեռ Միութիւնը նաեւ կազմակերպած է յատուկ տօնակատարութիւն մը, որ տեղի պիտի ունենայ յառաջիկայ շաբաթավերջին, Frazier Park-ի “Արեւ” ճամբարի մէջ։ Առաջնորդ Սրբազան Հօր տնօրինումով, Կիրակի, 7 Սեպտեմբերին, Ս. Պատարագ պիտի մատուցուի, հոգեհանգստեան արարողութիւն պիտի կատարուի եւ հերիսայի օրհնութիւն պիտի ըլլայ։ Ս. Պատարագը պիտի մատուցէ Հոգշ. Տ. Պօղոս Աբղ. Թինքճեան։ Օրուան պատգամախօսն է Դոկտ. Վահրամ Շէմմասեան։
***
