ԱՌԱՋՆՈՐԴ ՍՐԲԱԶԱՆԸ ԱՆԹԻԼԻԱՍԻ ՄԱՅՐԱՎԱՆՔԻՆ ՄԷՋ ՊԻՏԻ ՄԱՍՆԱԿՑԻ ԱԶԳ. ԿԵԴՐՈՆԱԿԱՆ ՎԱՐՉՈՒԹԵԱՆ ՆԻՍՏԵՐՈՒՆ
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան յառաջիկայ շաբաթասկիզբին Լիբանան կը մեկնի, Անթիլիասի մէջ մասնակցելու համար Մեծի Տանն Կիլիկիոյ Կաթողիկոսութեան Ազգային Կեդրոնական Վարչութեան Կրօնական, Քաղաքական եւ Խառն Ժողովներու նիստերուն, նախագահութեամբ Ն.Ս.Օ.Տ.Տ. Արամ Ա. Կաթողիկոսի։
Յաւելեալ մանրամասնութիւններ կը հաղորդենք օրին։
***
ՀՈԼԻՎՈՒՏԻ Ս. ԿԱՐԱՊԵՏ ՄԱՅՐ ԵԿԵՂԵՑՒՈՅ ԱՆՈՒԱՆԱԿՈՉՈՒԹԵԱՆ ՏՕՆ ԵՒ ՄԱՏԱՂՕՐՀՆԷՔ
Մեր եկեղեցւոյ տօնացոյցին համաձայն, Շաբաթ, 14 Յունուար 2017ը տօնն է Ս. Յովհաննու Կարապետին, որ նաեւ անուանակոչութեան տօնն է Հոլիվուտի Ս. Կարապետ Մայր Եկեղեցւոյ ու Լաս Վեկասի նոյնանուն եկեղեցւոյ:
Այս առիթով, Առաջնորդ Սրբազանը Կիրակի, 15 Յունուարին Ս. Պատարագ պիտի մատուցանէ Հոլիվուտի Ս. Կարապետ Մայր Եկեղեցւոյ մէջ, պիտի փոխանցէ իր պատգամը եւ պիտի կատարէ մատաղի օրհնութիւնը:
Եկեղեցական արարողութիւններէն ետք, Առաջնորդ Սրբազանը պիտի նախագահէ եկեղեցւոյ հոգեւոր հովիւին ու հոգաբարձութեան կողմէ կազմակերպուած տօնական ճաշկերոյթին: Բարի աւանդութիւն դարձած է, որ եկեղեցին ամէն տարի այս հանդիպումին պատիւի արժանացնէ գաղութին նուիրեալ ծառայութիւն մատուցած վաստակաւոր ազգային մը: Այս տարի պիտի մեծարուի Տիար Դաւիթ Երէցեան, որ բազմաթիւ տարիներ նուիրեալ ծառայութիւն մատուցած է Հոլիվտուի մեր համայնքին ու միաւորներուն՝ շրջանի Հ.Յ.Դ. «Գարեգին Նժդեհ» կոմիտէութեան ճամբով:
***
Հ.Մ.Ը.Մ.Ի ՆՈՐ ՏԱՐՈՒԱՆ ԵՒ Ս. ԾՆՆԴԵԱՆ ԽՐԱԽՃԱՆՔ
Հինգշաբթի, 12 Յունուարի երեկոյեան, Նոր Տարուան եւ Ս. Ծննդեան տօներուն առիթով, Հ.Մ.Ը.Մ.ի Արեւմտեան Միացեալ Նահանգներու Շրջանային Վարչութիւնը կազմակերպած էր խրախճանք մը Կլենտէյլի «Ֆինիսիա» ճաշարանին մէջ, մասնակցութեամբ շրջանի մասնաճիւղերու նորընտիր վարչութեանց, Շրջանային յանձնախումբերուն եւ Նաւասարդեան մարզախաղերու պատուոյ նախագահներուն։
Յանուն Առաջնորդ Սրբազան Հօր, ձեռնարկին ներկայ եղաւ Արժ. Տ. Վազգէն Աւ. Քհնյ. Աթմաճեան եւ փոխանցեց Առաջնորդ Սրբազանին Ամանորի եւ Ս. Ծննդեան շնորհաւորանքներն ու բարեմաղթանքները։
***
