ՀԱՆԳԱՆԱԿՈՒԹԻՒՆ Ի ՆՊԱՍՏ ԱՐՑԱԽԻ
Ինչպէս ծանօթ է, Ապրիլի առաջին օրերուն, Ազրպէյճան վայրագ յարձակում գործեց Արցախի սահմանային գօտիին վրայ, սակայն բախելով հայկական պաշտպանական ուժերու խիզախ դիմադրութեան, նահանջի մատնուեցաւ: Ազերիական յարձակումը պատճառեց մարդկային եւ նիւթական ծանր վնասներ: Աշխարհացրիւ հայութիւնը անմիջական օժանդակութիւններ հասցուց Արցախ, նաեւ ձեռնարկեց հանգանակային արշաւներու, սպեղանի տրամադրելու համար վիրաւորներուն եւ մարդկային ու նիւթական կորուստներ ունեցող ընտանիքներուն:
Այս ծիրին մէջ, «Հայաստան» Համահայկական հիմնադրամը Շաբաթ, 14 Մայիս 2016ին, կազմակերպած է պատկերասփիւռային հանգանակութիւն մը՝ Թելեթոն, որուն համար մեր գաղութի հայկական բոլոր յարանուանութեանց, կազմակերպութեանց ու միութեանց պատասխանատուները 9 Մայիսին կոչ ուղղեցին մեր ժողովուրդի զաւակներուն, որպէսզի լիաբուռն նուիրաբերեն ի նպաստ Արցախի, նեցուկ կանգնելու համար մանաւանդ հայրենիքի սահմանները պաշտպանող հայ զինուորին: Թելեթոնը պիտի պատկերասփռուի Լոս Անճելըսի KVMD կայանէն – թիւ 31 -, եւ հայկական կայաններէ, յետմիջօրէի ժամը 4էն 10:00:
Յիշեցնենք, որ Արցախի օժանդակութեան նպատակով, նախաձեռնութեամբ Ազգային Առաջնորդարանիս, հանգանակային աշխատանք կը տարուի նաեւ մեր Թեմի եկեղեցիներուն մէջ, ընդառաջելով Ս. Աթոռոյս գահակալ Ն.Ս.Օ.Տ.Տ. Արամ Ա. Կաթողիկոսի կոչին, որ արձակուեցաւ երկու Վեհափառ Հայրապետներուն Արցախ այցելութենէն ետք:
***
ԱՌԱՋՆՈՐԴ ՍՐԲԱԶԱՆԸ ՀՈԳԵԳԱԼՍՏԵԱՆ ՏՕՆԻՆ ՊԻՏԻ ՀԱՆԴԻՍԱՊԵՏԷ ՔՐԵՍԵՆԹԱ ՀՈՎԻՏԻ ԵԿԵՂԵՑՒՈՅ Ս. ՊԱՏԱՐԱԳԻՆ
Հայաստանեայց Առաքելական Եկեղեցւոյ տօնացոյցին համաձայն, այս Կիրակի, 15 Մայիս 2016-ը, Հոգեգալստեան տօնն է։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան պիտի հանդիսապետէ Քրեսենթա Հովիտի Եկեղեցւոյ Ս. Պատարագին եւ պիտի փոխանցէ օրուան խորհուրդը ներկայացնող իր պատգամը։
***
