ԵՊԻՍԿՈՊՈՍԱԿԱՆ Ս. ՊԱՏԱՐԱԳ ԵՒ ՍԱՐԿԱՒԱԳԱԿԱՆ ՁԵՌՆԱԴՐՈՒԹԻՒՆ ՕՐԷՆՃ ՔԱՈՒՆԹԻԻ Ս. ՔԱՌԱՍՆԻՑ ՄԱՆԿԱՆՑ ԵԿԵՂԵՑՒՈՅ ՄԷՋ
– ՀՈԳԵՀԱՆԳԻՍՏ՝ Հ.Մ.Ը.Մ.-Ի ՆՆՋԵՑԵԱԼՆԵՐՈՒ ՅԻՇԱՏԱԿԻՆ
Կիրակի, 13 Նոյեմբեր 2016ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ պիտի մատուցանէ եւ իր պատգամը պիտի փոխանցէ Օրէնճ Քաունթիի Սրբոց Քառասնից Մանկանց Եկեղեցւոյ մէջ։
Ս. Պատարագի ընթացքին, Առաջնորդ Սրբազանը սարկաւագներու ձեռնադրութիւն պիտի կատարէ. սարկաւագական կարգ պիտի ստանան ուրարակիրներ՝ Կարօ Քիլէճեան եւ Սարգիս Տէր Դաւիթեան։
Ս. Պատարագի աւարտին, Հ.Մ.Ը.Մ.-ի Արեւմտեան Միացեալ Նահանգներու Շրջանային Վարչութեան խնդրանքով եւ Առաջնորդ Սրբազան Հօր տնօրինութեամբ, Թեմիս բոլոր եկեղեցիներուն մէջ հոգեհանգստեան պաշտօն պիտի կատարուի ննջեցեալ Հ.Մ.Ը.Մ.-ականներու հոգիներու խաղաղութեան համար։
***
Հ.Մ.Ը.Մ.-Ի «ԱՐՏԱԿԱՐԳ ՊԱՏՈՒԱՆՇԱՆ»ՈՎ ՊԻՏԻ ՊԱՐԳԵՒԱՏՐՈՒԻ ԱՌԱՋՆՈՐԴ ՍՐԲԱԶԱՆԸ
Հ.Մ.Ը.Մ.-ի Արեւմտեան Միացեալ Նահանգներու Շրջանային Վարչութեան նախաձեռնութեամբ, Շաբաթ, 12 Նոյեմբերին, տեղի պիտի ունենայ «Հ.Մ.Ը.Մևի Օր»ուան երկրորդ տարեկան տօնախմբութիւնը, «Արարատ» մասնաճիւղի «Բաղդասարեան-Շահինեան» սրահին մէջ։
Ընդառաջելով Հ.Մ.Ը.Մ.-ի Արեւմտեան Միացեալ Նահանգներու Շրջանային Վարչութեան դիմումին, Հ.Մ.Ը.Մ.-ի Կեդրոնական Վարչութիւնը այս առիթով «Արտակարգ Պատուանշան»-ով պիտի պարգեւատրէ Առաջնորդ Սրբազան Հայրը, իբրեւ երախտագիտութեան արտայայտութիւն՝ Սրբազան Հօր, որ միշտ մօտէն կը գործակցի Շրջանային Վարչութեանց հետ եւ իր գլխաւորութեամբ է, որ Հ.Մ.Ը.Մ.-ի սկաուտական բաժանմունքը ունեցած է արի-արենոյշներու համար «Ս. Մեսրոպ Մաշտոց», իսկ գայլիկներու-արծուիկներու համար՝ «Գայլ Վահան եւ Ս. Վարդան» կրօնական շքանշանները:
***
