Ուրբաթ, 2 Նոյեմբեր 2018-ի առաւօտեան, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ընդունեց Ազգ. Առաջնորդարանի եւ գաղութի բարերարուհի Տիկին Ալիս Նաւասարկեանի այցելութիւնը։ Հանդիպումին ներկայ եղաւ Ազգ. Առաջնորդարանի Տիկնանց Օժանդակ Մարմինի ատենապետուհի Տիկին Ծովիկ Զէյթլեան։ Տիկին Ա. Նաւասարկեան սիրայօժար ստանձնած է Տիկնանց Օժանդակ Մարմինի Նոր Տարուան եւ Ս. Ծննդեան աւանդական ճաշկերոյթ-տօնավաճառի հիւրընկալութիւնը եւ այս նպատակին համար կը նուիրաբերէ 10.000 (տասը հազար) տոլար։
Առաջնորդ Սրբազանը ողջունեց ազնիւ բարերարուհիին այցելութիւնը եւ բարձր գնահատեց անոր յարատեւ զօրակցութիւնը՝ Ազգային Առաջնորդարանիս ու մեր գաղութի ծառայութիւն մատուցող միութեանց ու հաստատութեանց, նշելով, որ ամանորի յիշեալ ձեռնարկին հիւրընկալման քայլը նորագոյն արտայայտութիւն մըն է անոր սրտաբուխ նուիրաբերումներուն։
Ամանորեան ձեռնարկը տեղի պիտի ունենայ Չորեքշաբթի, 5 Դեկտեմբեին, կէսօրէ առաջ ժամը 11։30-ին, Brandview ճաշասրահին մէջ (111 East Harvard St., Glendale), հովանաւորութեամբ Առաջնորդ Սրբազան Հօր եւ կազմակերպութեամբ Ազգ. Առաջնորդարանի Տիկնանց Օժանդակ Մարմինին։
Տոմսերու համար կարելի է դիմել Ազգ. Առաջնորդարանի գրասենեակը, հեռաձայնելով 818-248-7737 թիւին կամ Տիկնանց Օժանդակ Մարմինի անդամներուն: Մուտքի նուէրն է $60։
