Երեքշաբթի 28 Ապրիլ 2015ին Մեծի Տանն Կիլիկիոյ Կաթողիկոսութիւնը դատ բացաւ Թուրքիոյ Սահմանադրական Դատարանին մօտ՝ պահանջելով Սիսի իր պատմական Կաթողիկոսարանին վերադարձը։ Անցնող երկու տարիներու ընթացքին, յիշեալ դատի պատրաստութեան աշխատանքին լծուած էր թրքական ու միջազգային դատավարական օրէնքներու մասնագէտներէ բաղկացած յանձնախումբ մը՝ Ն.Ս.Օ.Տ.Տ. Արամ Ա. Վեհափառ Հայրապետին գլխաւորութեամբ։
Կաթողիկոսարանին կալուածները, որոնց մաս կը կազմէ Ս. Սոֆիա եկեղեցին եւ միաբաններու վանքը, կը գտնուին այժմու Թուրքիոյ Ատանայի շրջանի Գոզան քաղաքին մէջ. աւելի քան եօթը դար հայ եկեղեցւոյ կեդրոն հանդիսացող կաթողիկոսարանին կալուածները Թուրքիոյ կառավարութեան կողմէ բռնագրաւուեցան Ցեղասպանութեան օրերուն եւ Կաթողիկոսարանը, մեր ժողովուրդին նման, դարձաւ աքսորական, ի վերջոյ հասատատուելով Լիբանանի Անթիլիաս աւանին մէջ: Սիսի Կաթողիկոսարանի եւ ապա ազգապատկան ու եկեղեցապատկան կալուածներու վերադարձը կրնայ կարեւոր քայլ մը դառնալ՝ մեր ժողովուրդի կալուածներուն վերադարձին եւ բռնաբարուած իրաւունքներու վերականգնումին ճամբուն վրայ։
Չորեքշաբթի, 29 Ապրիլին, մամլոյ ասուլիս մը տեղի ունեցաւ Ուաշինկթընի Մամլոյ ազգային ակուբին մէջ, մեր պահանջքը օտար շրջանակներուն ու միջազգային համայնքին ծանօթացնելու համար։ Յառաջիկային, մամլոյ ասուլիս պիտի կազմակերպուի նաեւ Ժընեւի մէջ։ Այս դատին մասին վերջին նորութիւններուն կարելի է հետեւիլ Կաթողիկոսարանի կայքէջին վրայ.- www.armenianorthodoxchurch.org
