Շաբաթ, 22 Հոկտեմբեր 2016-ին, Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան Ազգային Առաջնորդարանին մէջ ընդունեց այցելութիւնը Ծիծեռնակաբերդի Հայոց Ցեղասպանութեան Թանգարան-հիմնարկի տնօրէն՝ Դոկտ. Հայկ Տեմոյեանին։
Հանդիպման ընթացքին արծարծուեցան անցեալ տարի կայացած Հայոց Ցեղասպանութեան 100-ամեակի յիշատակութեան ձեռնարկներն ու «Երրորդ Հանրապետութեան վե՞րջը, ինչ կարելի է ակնկալել Հայաստանի ապագայի մասին» դասախօսական նիւթը, որ պատուարժան հիւրը պիտի ներկայացնէր Կիրակի, 23 Հոկտեմբեր 2016-ին, Միշըն Հիլզի «Արարատ-Էսքիճեան» թանգարանին մէջ։
Հանդիպման աւարտին, տեղի ունեցաւ յուշանուէրներու փոխանակում. Առաջնորդ Սրբազան Հայրը Դոկտ. Հայկ Տեմոյեանին նուիրեց Ազգային Առաջնորդարանի գիրքերէն եւ անմոռուկի պատկերով թղթակալ՝ պատրաստուած Ցեղասպանութեան 100-ամեակին առիթով, իսկ պատուարժան հիւրը Առաջնորդ Սրբազան Հօր նուիրեց վերջերս հրատարակած «Հայկական Սպորտը» գիրքէն օրինակ մը, որուն գինեձօնը տեղի ունեցած էր Չորեքշաբթի, 19 Հոկտեմբերին, եւ յանուն Առաջնորդ Սրբազան Հօր, Արժ. Տ. Կոմիտաս Աւ. Քհնյ. Թորոսեան ներկայ գտնուեցաւ այդ ձեռնարկին։
