Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Հինգշաբթի, 2 Յունիս 2016ին, ընդունեց այցելութիւնը Հ.Յ.Դ. Բիւրոյի անդամ Դոկտ. Վիգէն Եագուպեանի եւ Արեւմտեան Միացեալ Նահանգներու Կեդրոնական Կոմիտէի ներկայացուցիչ Տիար Տարօն Տէր Խաչատուրեանի այցելութիւնը: Երկու ներկայացուցիչները Ազգ. Առաջնորդարան եկած էին Առաջնորդ Սրբազանը շնորհաւորելու Ազգ. Երեսփոխանական Ժողովին կողմէ 6րդ քառամեակի մը համար վերընտրութեան առիթով: Ներկայ էր նաեւ Թեհրանի Հայոց Թեմի Առաջնորդ Բարձր. Տ. Սեպուհ Արք. Սարգիսեան:
Հանդիպումը առիթ եղաւ խորհրդակցելու մեր գաղութը յուզող անմիջական հարցերու, ինչպէս նաեւ հայութեան դիմագրաւած ընդհանրական մարտահրաւէրներուն մասին: Գոհունակութիւն արձանագրուեցաւ մասնաւորապէս նոյն օրը, Գերմանիոյ խորհրդարանին կողմէ Հայոց Ցեղասպանութեան ճանաչման մասին որդեգրուած բանաձեւին մասին. այս գծով տեղի ունեցաւ միտքերու փոխանակում՝ համապատասխան առաջադրանքներու նպատակով:
Առաջնորդ Սրբազանը շնորհակալութիւն յայտնեց շնորհաւորանքին ու բարի մաղթանքներուն համար, հաստատելով, որ յառաջիկայ շրջանին եւս, հայկական միութեանց ու կազմակերպութեանց հետ Ազգ. Առաջնորդարանի սերտ գործակցութիւնը պիտի շարունակուի ի խնդիր գաղութի ու հայկական խնդիրներու դիմագրաւման:
