Չորեքշաբթի, 31 Հոկտեմբեր 2018-ի յետմիջօրէին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ընդունեց այցելութիւնը Լոս Անճելըս գաւառի կալուածային տուրքերու բաժանմունքի պաշտօնատար (Assessor) Տիար Ճեֆրի Փրէնկի, որ Երեքշաբթի, 6 Նոյեմբերին կայանալիք ընտրութիւններուն նախօրեակին եկած էր Առաջնորդ Սրբազան Հօր օրհնութիւնն ու յաջողութեան բարեմաղթութիւնները ստանալու։ Տիար Փրէնկին կ’ընկերանար Հանրային Կապերու վարիչ պատասխանատու Տիար Ռապըրթ Քալոնեան։
Փոխադարձ ծանօթութենէ ետք, խօսակցութիւնը կեդրոնացաւ Ազգային Առաջնորդարանի եւ Միացեալ Նահանգներու մէջ հայութեան գործունէութեան ու հայոց ցեղասպանութեան մասին։
Առաջնորդ Սրբազանը գնահատեց Տիար Փրէնկի ծառայութիւնը եւ յաջողութիւն մաղթեց ընտրապայքարին ու անոր յառաջիկայ ծրագիրներուն։
