«Կեթի» թանգարանի ձեռագրաց բաժանմունքի աւագ գիտաշխատող՝ Դոկտ. Էլիզապէթ Մօրիսընի հրաւէրով, Երեքշաբթի, 25 Հոկտեմբեր 2016-ին, Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան, Լոս Անճելըսի մօտ Հայաստանի գլխաւոր հիւպատոս Տիար Սերգէյ Սարգիսով, Ծիծեռնակաբերդի Հայոց Ցեղասպանութեան Թանգարան-հիմնարկի տնօրէն՝ Դոկտ. Հայկ Տեմոյեանն ու Թեմիս Ազգային Վարչութեան Ատենապետ Տիար Վահէ Յովակիմեանը այցելեցին «Կեթի» թանգարան, ուր հրապարակաւ կը ցուցադրուի 13րդ դարու «Զէյթունի Աւետարան»ի ձեռագիր մագաղաթէն պատառիկներ, որ գործն է միջնադարու Կիլիկեան մանրանկարչութեան լաւագոյն ծաղկողներէն՝ Թորոս Ռոսլինի։ Այցելութեան ընթացքին ներկայ էր նաեւ թանգարանի տեղեկատուական բաժանմունքի եւ հանրային հարցերու պատասխանատու՝ փոխ-տնօրէն Ճօն Կիւրինին։
Այցելուները հիւրասիրութեամբ պատուուեցան թանգարանի տնօրէնութեան կողմէ, որուն ընթացքին արծարծուեցան զանազան նիւթեր, առնչուած՝ հայ մշակոյթի ամսուան, հայ-ամերիկեան համայնքի հարցերուն եւ համագործակցութեան։
Առաջնորդ Սրբազան Հայրը Թանգարանին նուիրեց Մեծի Տանն Կիլիկիոյ Կաթողիկոսութեան վերջին հրատարակութենէն «The Catholicosate of Cilicia: History, Treasures, Mission» օրինակ մը։
Հայ մշակոյթի ամսուան առթիւ, «Զէյթունի Աւետարան»ի ձեռագիր մագաղաթներու պատառիկները հրապարակաւ կը ցուցադրուին հանրութեան մինչեւ 1 Յունուար 2017ը։ Կը հրաւիրենք մեր համայնքի զաւակները, որպէսզի անձամբ այցելեն եւ վայելեն միջնադարու Կիլիկեան մանրանկարչութեան գլուխ գործոցներէն համարուող «Զէյթունի Աւետարան»ի ձեռագիր մագաղաթը։
