ԱՌԱՋՆՈՐԴ ՍՐԲԱԶԱՆԸ ՊԻՏԻ ՀԱՆԴԻՍԱՊԵՏԷ ՔՐԵՍԵՆԹԱ ՀՈՎԻՏԻ ՀԱՅՑ. ԱՌԱՔԵԼԱԿԱՆ ԵԿԵՂԵՑՒՈՅ Ս. ՊԱՏԱՐԱԳԻՆ
Կիրակի, 5 Փետրուար 2017ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան պիտի հանդիսապետէ Քրեսենթա Հովիտի Հայց. Առաք. Եկեղեցւոյ Ս. Պատարագին եւ պիտի փոխանցէ իր պատգամը։
***
ԱՌԱՋԱՒՈՐԱՑ ՊԱՀՔԻ ԱՌԻԹՈՎ ԽԱՉԱՀԱՆԳԻՍՏ ԵՒ ՋՐՕՐՀՆԷՔ
Այս տարի Առաջաւորաց պահքի Բարեկենդանը կը համընկնի Կիրակի, 5 Փետրուարին։ Մեծ Պահքի կարապետ հանդիսացող այս պահքը իւրայատուկ է Հայց. Առաքելական Ս. Եկեղեցւոյ եւ հաստատուած Ս. Գրիգոր Լուսաւորիչ Հայրապետին կողմէ, մեր ազգի Քրիստոնէութեան դարձին առիթով։ Առաջաւորաց պահքը մեր ժողովուրդի բարեպաշտութեան մէջ թիւրիմացաբար ծանօթ է նաեւ Ս. Սարգիսի պահք անունով, քանի որ Առաջաւորաց պահքին յաջորդող շաբաթ օրը Հայաստանեայց եկեղեցին կը նշէ Ս. Սարգիսի տօնը:
Եռօրեայ ծոմապահութիւնը կը սկսի Կիրակի, 5 Փետրուարի կէս գիշերին եւ կը շարունակուի մինչեւ Չորեքշաբթի, 8 Փետրուարի առաւօտը։
Չորեքշաբթի առաւօտեան, Թեմիս եկեղեցիներուն մէջ Առաջաւորաց պահքի խաչահանգիստ եւ ջրօրհնէք կը կատարուի, որմէ ետք հաւատացեալ ծոմապահները Ս. Հաղորդութիւն եւ օրհնուած ջուր կը ստանան։
***
