ԵՊԻՍԿՈՊՈՍԱԿԱՆ Ս. ՊԱՏԱՐԱԳ ԵՒ ՈՒՐԱՐԻ ՏՈՒՉՈՒԹԻՒՆ ՖՐԵԶՆՈՅԻ Ս. ԵՐՐՈՐԴՈՒԹԵԱՆ ՄԱՅՐ ԵԿԵՂԵՑՒՈՅ 116-ՐԴ ՏԱՐԵԴԱՐՁԻՆ ԱՌԻԹՈՎ
Ֆրեզնոյի հայ համայնքը այս տարի կը տօնէ Ս. Երրորդութիւն Մայր Եկեղեցւոյ օծման 116-րդ տարեդարձը։ 1900 թուականի Հոկտեմբեր 14-ին էր, երբ Քալիֆորնիոյ առաջին հայ համայնքը Աստուծոյ նախախնամութեամբ եւ հիմնադիրներու ջանասիրութեամբ՝ հաստատուն վէմի վրայ կառուցեց շքեղ Մայր Եկեղեցի մը, որ պիտի ըլլար Քալիֆորնիահայ գաղութի փրկութեան լաստն ու գոյատեւման եւ ամրապնդման առհաւատչեան։
Այս առթիւ, Կիրակի, 20 Նոյեմբեր 2016-ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ պիտի մատուցանէ եւ իր պատգամը պիտի փոխանցէ Ս. Երրորդութիւն Մայր Եկեղեցւոյ մէջ. Ս. Պատարագի ընթացքին, Առաջնորդ Սրբազանը ուրար կրելու իրաւունք պիտի շնորհէ եկեղեցւոյ դպիրներէն՝ Մինաս Արիսեանի, Ռաֆֆի Աբգարեանի, Կարէն Ծնունդեանի, Նարեկ Աբգարեանի, Յովիկ Օհանեանի, Արմէն Աբգարեանի, Վահէ Օհանեանի ու Զարեհ Աբգարեանի։ Առաջնորդ Սրբազանը նաեւ պիտի կատարէ եկեղեցական նոր սպասներու օրհնութիւնը։
Ս. Պատարագի աւարտին, եկեղեցւոյ սրահին մէջ, տեղի պիտի ունենայ 116-ամեակի ճաշկերոյթը։
