Շաբաթ, 31 Յունուար 2015ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ներկայ եղաւ Անտիոքի Ուղղափառ Եկեղեցւոյ Նիւ Եորքի եւ Հիւսիսային Ամերիկայի նոր Առաջնորդ Գերշ. Տ. Ժոզէֆ Արք. Զահլաուիի ի պատիւ կազմակերպուած պաշտօնական ընդունելութեան: Նորընտիր Առաջնորդին գահակալութեան արարողութիւնը տեղի ունեցած էր 6 Դեկտեմբերին, Նիւ Եորքի Ս. Նիկողայոս Անտիոքի Ուղղափառ Եկեղեցւոյ մայր տաճարին մէջ։ Զահլաուի Արքեպիսկոպոսը իր այս պաշտօնին կոչուելէ առաջ, շուրջ 20 տարի ծառայած էր համայնքի Լոս Անճելըսի եւ Արեւմտեան Ամերիկայի թեմէն ներս: Նոր առաքելութեան սկզբնաւորման առիթով, Առաջնորդ Սրբազանը շնորհաւորական նամակ մը յղած էր անոր:
Շաբաթ երեկոյեան, “Sheraton Universal” պանդոկին մէջ տեղի ունեցած յիշեալ ընդունելութեան առիթով, Առաջնորդ Սրբազանը անձամբ շնորհաւորեց Զահլաուի Արքեպիսկոպոսը, որուն հետ ունի երկու տասնամեակներու ծանօթութիւն եւ գործակցութիւն: Իր արտասանած սրտի խօսքին մէջ, Առաջնորդ Սրբազանը աղօթք բարձրացուց առ Աստուած, որպէսզի անոր քայլերը առաջնորդէ այս նոր առաքելութեան մէջ: Ան վկայեց, որ Զահլաուի Արքեպիսկոպոսը Քրիստոսի հաւատարիմ մէկ ծառան է, իր հօտին բարի հովիւ մը եւ հոգեւոր առաջնորդ մը, որ արժանի է այս պատիւին: Ան իր խօսքը եզրափակեց մաղթելով քաջառողջութիւն, երկնատուր իմաստութիւն եւ կարողութիւն՝ արժանավայել կերպով վարելու իր թեմն ու հովուելու իր հօտը:
Առաջնորդ Սրբազանը իր խօսքի աւարտին, յանուն Հիւսիսային Ամերիկայի Արեւմտեան մեր Թեմին, եւ իբրեւ սիրոյ արտայայտութիւն, ոսկեզոծ ձեռաց խաչ մը նուիրեց Զահլաուի Արքեպիսկոպոսին։
