Ինչպէս ծանօթ է, Գոհաբանութեան տօնի նախօրեակին, Արցախի պատուիրակութիւնը՝ գլխաւորութեամբ Արցախի Թեմի Առաջնորդ Բարձր. Տ. Պարգեւ Արք. Մարտիրոսեանի եւ փոխ-վարչապետ Զօր. Արթիւր Աղաբէկեանի, ժամանեց Լոս Անճելըս, մասնակցելու համար «Հայաստան» Համահայկական Հիմնադրամի 19րդ թելեթոնին։
Լոս Անճելըսի մօտ Հայաստանի Հանրապետութեան գլխաւոր հիւպատոսութիւնը կազմակերպած էր ընդունելութիւն մը՝ ի պատիւ յարգարժան հիւրերուն: Ընդունելութիւնը տեղի ունեցաւ Հայաստանի հիւպատոսարանին մէջ, Կլենտէյլ, Չորեքշաբթի, 23 Նոյեմբեր 2016-ին: Ներկայ էին Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան, ընկերակցութեամբ Արժ. Տ. Վազգէն Աւ. Քհնյ. Աթմաճեանի, համայնքի հոգեւոր եւ ազգային ղեկավարներ ու պաշտօնատարներ։
Ելոյթ ունեցան Զօր. Արթիւր Աղաբէկեան եւ Հայաստանի հիւպատոսարանի խորհրդական Տիար Ռազմիկ Ստեփանեան, շեշտելով Թելեթոնի մեր գաղութի հաւաքական մասնակցութեան հրամայականը, Արցախի ժողովուրդի զօրակցութեան համար։
