Կիրակի, 27 Ապրիլ 2014-ի երեկոյեան, Փասատինա քաղաքի Memorial Park-ին մէջ տեղի ունեցաւ նոր կառուցուելիք Հայկական Ցեղասպանութեան Յուշարձանի հիմնօրհնէքը: Յիշեալ ձեռնարկին իր մասնակցութիւնը բերաւ Թեմիս Բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան։ Առաջնորդ Սրբազան Հօր կ’ընկերանային Հոգշ. Տ. Պօղոս Աբղ. Թինքճեան, Արժ. Տ. Նարեկ Աւ. Քհնյ. Փեհլիվանեան, Արժ. Տ. Խորէն Քհնյ. Պապօշեան եւ Արժ. Տ. Պօղոս Քհնյ. Պալթայեան:
Յայտագիրը սկիզբ առաւ Քալիֆորնիոյ նահանգի խորհրդարանի նախկին անդամ եւ Յուշարձանի Յանձնախումբի անդամ Էնթընի Փորթանթինոյի ողջոյնի խօսքով, ուր շնորհակալութիւն յայտնեց հոգեւոր առաջնորդներու ներկայութեան ու նախագահութեան, որմէ ետք ներկաները թափօրով “Այսօր Յարեաւ” շարականի երգեցողութեամբ քալեցին դէպի յուշարձանի կառուցման հողաշերտը, եւ այնտեղ Սաղմոսներով եւ Աւետարանով կատարուեցաւ հիմնօրհնէքի արարողութիւնը։ “Օրհնեսցի եւ Սրբեսցի զհողաշերտս յուշարձանի ցեղասպանութեան Հայոց, եւ զհողս մայր Հայաստանի” բառերով օրհնուեցաւ կառուցման հողաշերտը եւ Հայաստանէն բերուած հողը, որ օրհնութենէն անմիջապէս ետք Սրբազան Հօր ձեռքով աւելցուեցաւ կառուցուելիք յուշարձանի հողաշերտին վրայ:
Ապա ներկայ բազմութեան ուղղելով իր խօսքը, Առաջնորդ Սրբազանը յայտնեց, թէ աշխարհի տարածքին կառուցուած են աւելի քան 200 Հայոց ցեղասպանութեան նուիրուած յուշարձաններ, եւ ահաւասիկ այս մէկը պիտի աւելնայ անոնց շարքին, որպէս յուշարար մեր ժողովուրդի եւ օտար ազգերու զաւակներուն, թէ մենք չենք մոռցած մեր նահատակները, եւ պիտի մնանք մեր պահանջատիրութեան ու արդար իրաւունքներու պաշտպանման հաստատ կամքին մէջ:
Հիմնօրհնէքի արարողութենէն ետք, գործադրուեցաւ պատշաճ յայտագիր մը հանդիսավարութեամբ դաշնակցային կառավարութեան դատաւոր Տիգրան Թեւրիզեանի։
