Չորեքշաբթի, 24 Յուլիս 2019-ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան այցելեց Փասատինայի Ս. Սարգիս եկեղեցւոյ ամառնային Ս. Գրային դպրոց եւ իր օրհնութիւններն ու պատգամը փոխանցեց մանուկներուն։
Եկեղեցւոյ Հոգեւոր Հովիւ՝ Արժ. Տ. Պօղոս Քհնյ. Պալթայեան բարի գալուստ մաղթեց Առաջնորդ Սրբազանին եւ ներկայացուց ամառնային Ս. Գրային դպրոցէն ներս կատարուած աշխատանքները։ Ապա, փոքրիկները իրենց սորված շարականները, սաղմոսները եւ աղօթքները խանդավառ կերպով ներկայացուցին։
Առաջնորդ Սրբազանը բարձրօրէն գնահատեց Տէր Հայրը, Հոգաբարձութիւնը, Տիկնանց Միութիւնն ու ուսուցչաց կազմը, որոնք 7 տարի շարունակ լծուած են այս ազգաշէն աշխատանքին։ Ան փոքրիկներուն բացատրեց, թէ ինչո՛ւ իւրաքանչիւր հայ մանուկ պէտք է գոհութիւն յայտնէ Երկնաւոր Հօր Աստուծոյ իւրաքանչիւր բարիքի համար։ Մտերմիկ հանդիպումը աւելի եւս հետաքրքրական դարձաւ, երբ ան փոքրիկներուն ճաշէ ետք արտասանուող «Փառք կերակրողին» աղօթքը սորվեցուց՝ այսպիսով երեխաներուն մէջ գոհունակ եւ երախտապարտ ըլլալու զգացումը աւելի եւս արմատաւորելով ու իմաստաւորելով։
Հանդիպումի աւարտին, Առաջնորդ Սրբազանը յուշանուէրներ փոխանցեց փոքրիկներուն եւ զանոնք «Պահպանիչ» աղօթքով օրհնեց, որմէ ետք ուղղուեցաւ եկեղեցւոյ կից «Անտոնեան» սրահ, ուր ցուցադրուած էին մասնակից երեխաներու ձեռային աշխատանքները։
