Հ.Մ.Ը.Մ.-ի Շրջանային Վարչութիւնը Շաբաթ, 2 Յունիս 2018-ին, իր կեդրոնի «Անտոնեան» սրահին մէջ կազմակերպած էր արի-արենոյշներու համար դաստիարակչական դասընթացք մը, որուն մասնակցեցան սկաուտական վկայեալ կարգի շուրջ 35 թեկնածուներ։ Մէկ օրուան վրայ երկարող դասընթացքը ունէր նաեւ ազգային-կրօնական դասախօսութեան բաժին։
Ընդառաջելով Շրջ. Վարչութեան խնդրանքին, եւ տնօրինութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի, Արժ. Տ. Վազգէն Աւ. Քհնյ. Աթմաճեան ներկայացուց կրօնական նիւթը, որ կ’ընդգրկէր մեր եկեղեցւոյ պատմութիւնը, նուիրապետական աթոռները, հայկական յարանուանութիւնները, կրօնական դաստիարակութեան կարեւորութիւնը եւ աղանդները։
