Ուրբաթ, 6 Դեկտեմբեր 2019-ին, «Ֆենիսիա» ճաշարանէն ներս տեղի ունեցաւ գնահատանքի երեկոյ՝ ի պատիւ Կլենտէյլի Ս. Աստուածածին եկեղեցւոյ նորոգ ձեռնադրեալ չորս սարկաւագներուն՝ Յարութիւն Օհաննէսեանի, Մելվին Արզումանեանի, Գօգօ Գազանճեանի եւ Վահիկ Եղիայեանի։ Նշենք, որ սարկաւագաց ձեռնադրութիւննը տեղի ունեցած էր Կիրակի, 20 Հոկտեմբերին, ձեռամբ՝ Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեանի։
Ձեռնարկին ներկայ էին Առաջնորդական Փոխանորդ Գերշ. Տ. Թորգոմ Եպս. Տօնոյեան, Ս. Աստուածածին եկեղեցւոյ հոգեւոր հովիւներ՝ Արժ. Տ. Վազգէն Աւ. Քհնյ. Աթմաճեան, Արժ. Տ. Կոմիտաս Աւ. Քհնյ. Թորոսեան եւ Արժ. Տ. Արտակ Քհնյ. Տէմիրճեան, ինչպէս նաեւ Արժ. Տ. Մովսէս Քհնյ. Շաննաքեան, երեսփոխաններ, Հոգաբարձութեան եւ Տիկնանց Միութեան անդամներ, սարկաւագներ, դպիրներ, ծնողներ եւ հաւատացեալներ։
Բարի գալուստի խօսք արտասանեց Արժ. Տ. Արտակ Քհնյ. Տէմիրճեան, որ ներկայացուց սարկաւագները եւ մաղթեց, որ անոնք եւս նախասարկաւագ Ս. Ստեփանոսի օրինակով ընթանան Քրիստոսի ուղիէն եւ իրենց ամբողջանուէր ծառայութիւնը բերեն Հայ Եկեղեցւոյ անդաստանէն ներս։ Ան նոյնպէս երախտագիտութիւն յայտնեց Առաջնորդական Փոխանորդին, որ ութամսեայ ծրագրով եւ յատուկ դասընթացքներով նախապատրաստած էր սարկաւագները՝ անոնց կրօնական գիտելիքներ ջամբելով։ Ան յատուկ շնորհակալութիւն յայտնեց նաեւ օրուան հիւրընկալներուն՝ Տէր եւ Տիկին Հրայր Սրկ. եւ Աստղիկ Թէճիրեաններուն եւ Տէր եւ Տիկին Արա եւ Թինա Շապանեաններուն։
Փակման խօսքը արտասանեց Առաջնորդական Փոխանորդը, որ կարեւորեց Ս. Աստուածածին եկեղեցւոյ դերը ընդհանրապէս ամերիկահայութեան եւ մասնաւորապէս Կլենտէյլի համայնքի կեանքէն ներս։
Ան յատուկ կերպով գնահատեց եկեղեցւոյ հոգեւոր հովիւները, երեսփոխաններր, Հոգաբարձութիւնը, նորոգ ձեռնադրեալ սարկաւագները, դպրաց դասը եւ եկեղեցւոյ մեծ ընտանիքը։ Աւարտին, յանուն Թեմիս Առաջնորդ Սրբազան Հօր յատուկ վկայագիրներ փոխանցեց չորս սարկաւագներուն, ինչպէս նաեւ դպրութեան նոր կարգ ստացած դպիր Արամ Բաբուխեանին։
