ԽԱՉՎԵՐԱՑԻ ՏՕՆԻՆ ԱՌԻԹՈՎ ԵՊԻՍԿՈՊՈՍԱԿԱՆ Ս. ՊԱՏԱՐԱԳ ԵՒ ՄԱՏԱՂՕՐՀՆԷՔ ՄՈՆԹԵՊԵԼԼՈՅԻ Ս. ԽԱՉ ՄԱՅՐ ՏԱՃԱՐԻՆ ՄԷՋ
Հայաստանեայց Առաքելական եկեղեցին այս Կիրակի, 13 Սեպտեմբեր 2015-ին, Վերացման Ս. Խաչի տաղաւար տօնը պիտի նշէ, որ միաժամանակ Մոնթեպելլոյի Ս. Խաչ Մայր Տաճարի անուանակոչութեան օրն է։
Այս առիթով, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ պիտի մատուցանէ եւ իր պատգամը պիտի փոխանցէ Ս. Խաչ Մայր Տաճարին մէջ։
Յաւարտ Ս. Պատարագի, նախագահութեամբ Առաջնորդ Սրբազան Հօր, տեղի պիտի ունենայ ռեհանի եւ մատաղի օրհնութիւն եւ հաւաքական սիրոյ ճաշ, «Բաղրամեան» սրահին մէջ, հիւրընկալութեամբ Եկեղեցւոյ Տիկնանց Միութեան։
Նշենք թէ Խաչվերացի տօնը մեր եկեղեցիներու Կիրակնօրեայ վարժարաններու արձանագրութեան եւ վերամուտի օրն է։ Կիրակնօրեայի ուսուցիչներն ու աշակերտները իրենց շրջանի եկեղեցիներուն մէջ ներկայ պիտի ըլլան Ս. Պատարագի ու Ս. Հաղորդութիւն պիտի ստանան, նոր տարեշրջանը աղօթքով ու Աստուծոյ հետ հաղորդակցութեամբ սկսելու համար։
Նոյն օրը, կազմակերպութեամբ Քալիֆորնիոյ Մուսա Լեռ Հայրենակցական Միութեան, Ս. Պատարագ պիտի մատուցուի եւ մատաղի օրհնութիւն տեղի պիտի ունենայ Կլենտէյլի Civic Auditorium-ին մէջ, Մուսա Լերան հերոսամարտի 100-ամեակին առիթով։ Առաջնորդ Սրբազան Հօր տնօրինումով, Ս. Պատարագը պիտի մատուցէ Հոգշ. Տ. Պօղոս Վրդ. Թինքճեան։
***
ԱՌԱՋՆՈՐԴ ՍՐԲԱԶԱՆԸ ՆԵՐԿԱՅ ԵՂԱՒ ԿԱԹՈՂԻԿԷ ԵՐԵՔ ԵՊԻՍԿՈՊՈՍՆԵՐՈՒ ՁԵՌՆԱԴՐՈՒԹԵԱՆ ԱՐԱՐՈՂՈՒԹԵԱՆ
Ընդառաջելով Լոս Անճելըսի Կաթողիկէ Եկեղեցւոյ Առաջնորդ Հոզէ Կոմէզ Արքեպիսկոպոսի հրաւէրին, Առաջնորդ Սրբազանը Երեքշաբթի, 8 Սեպտեմբերի յետմիջօրէին, Our Lady of the Angels տաճարին մէջ ներկայ եղաւ եպիսկոպոսական ձեռնադրութեան արարողութեան մը: Ձեռնադրութեան արժանացան երեք հոգեւորականներ՝ Ռապըրթ Պարըն, Ճոզըֆ Պրենըն եւ Տէյվիտ Օքանըլ: Առաջնորդ Սրբազանը շնորհաւորեց Կոմէզ Արքեպիսկոպոսը եւ ձեռնադրեալները:
***
