Հայաստանեայց Առաքելական Եկեղեցւոյ տօնացոյցին համաձայն, իւրաքանչիւր Տաղաւար տօնի յաջորդող օրը Մեռելոց յիշատակի օր է։ Մեր Թեմի տարիներու իմաստալից աւանդութեան համաձայն, այս տարի եւս Սուրբ Յարութեան Տօնի Մեռելոց յիշատակակի օրը, հանդիսապետութեամբ Թեմիս Բարեջան Առաջնորդ Բարձր. Տ. Մուշեղ Ս. Արք. Մարտիրոսեանի եւ մասնակցութեամբ Թեմի հոգեւորականաց Դասին, Երկուշաբթի, 21 Ապրիլ 2014ի առաւօտուն, Հոլիվուտ Հիլզի “Ֆօրէսթ Լօն” գերեզմանատան մէջ տեղի ունեցաւ Հոգեհանգստեան արարողութիւն եւ Անդաստան։
Հաւատացեալներու մեծ բազմութիւն մը ներկայ էր Հոգեհանգստեան արարողութեան, որոնք իրենց ննջեցեալ հարազատներուն ու բարեկամներուն հոգիներուն համար եկած էին աղօթք մատուցելու։
Առաջնորդ Սրբազան Հօր գլխաւորութեամբ, Հոգեւորականաց Դասը Թափօրով ուղղուեցաւ “Hall of Liberty” սրահ, ուր նախ գան արարողութիւնը՝ Արժ. Տ. Գարեգին Քհնյ. Պետուրեան բացատրեց օրուան խորհուրդն ու իմաստը, շեշտելով թէ Քրիստոսի յարութեան յոյսով լեցուած, եկած ենք աղօթք բարձրացնելու մեր ննջեցեալներուն համար, զանոնք յուսադրելու Քրիստոսի երկրորդ գալուստով ու փրկութեան աւետիսով, ինչպէս նաեւ մխիթարուելու փրկութեան յոյսով որ Քրիստոսի գալուստին ժամանակ տեղի պիտի ունենայ երբ ողջերն ու մեռածները յարութիւն պիտի առնեն ու արդար դատաստանին պիտի ներկայանան։
Ապա Առաջնորդ Սրբազան Հօր նախագահութեամբ տեղի ունեցաւ Հոգեհանգստեան արարողութիւն, որուն ընթացքին յիշուեցան մեր ազգի հին եւ նոր, ծանօթ եւ անծանօթ, յայտնի կամ անյայտ ննջեցեալները։ Ապա քահանայ հայրերը յիշեցին հաւատացեալներուն կողմէ խնդրուած ննջեցեալներու անունները, աղօթք բարձրացնելով որ Աստուած ողորմի եւ հանգիստ շնորհէ անոնց հոգիներուն։
Հոգեհանգստեան աւարտին, հոգեւորականաց Դասն ու ներկայ բազմութիւնը Թափօրով ուղղուեցան դէպի բակ ուր տեղի ունեցաւ Անդաստանի արարողութիւն եւ օրհնուեցան բոլոր ննջեցեալներուն գերեզմանները։ Օրուան արարողութիւնը վերջ գտաւ “Հայր Մեր”ի եւ “Կիլիկիա”ի երգեցողութեամբ։
