Կիրակի, 29 Սեպտեմբեր 2019-ին, «Beverly Hilton» պանդոկէն ներս տեղի ունեցաւ Հարաւային Քալիֆորնիոյ Համալսարանի Հայագիտական ամպիոնի 15-ամեակի ճաշկերոյթը։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան եւ Ազգ. Վարչութեան անդամներ ներկայ գտնուեցան հանդիսութեան։
Յայտագիրը սկիզբ առաւ քայլերգներու երգեցողութեամբ, ապա յարգանք մատուցուեցաւ հանգուցեալներ Դոկտ. Միհրան Աղպապեանի եւ Ճան Պէրպէրեանի յիշատակին։ Կազմակերպիչ յանձնախումբի անունով խօսքեր արտասանեցին համաատենապետներ՝ Տիկնայք Տայան Քապրալոֆ եւ Լոռի Մունչերեան։ Կրթական հիմնադրամի նուիրատու ընտանիքներուն ուղղուած գնահատանքի խօսքեր արտասանեցին, հիմնարկի խորհուրդի ատենապետ Տիար Չարլի Կալեան, հիմնարկի վարիչ Տիկին Սալբի Ղազարեան, գրականութեան, արուեստներու եւ գիտութիւններու ուսումնական վարիչ Տիկին էմպըր Միլըր, որոնք յատուկ գնահատանքի արժանացուցին Թրբանճեան Կրթական Հիմնադրամն եւ այլ հիմնադրամներու նուիրատուներ։
